You are here

حنفية أبو إسماعيل!

الله.....الوطن.....ام الخلول - Wed, 14/03/2012 - 12:32pm



حنفية أبو إسماعيل!
الحقيقة مش عارف ابتدي منين. كل أصدقائي و معارفي،على فيسبوك بالذات، عارفين اني متجاهل تماما موضوع إنتخابات الرئاسة، و ان الموضوع بالنسبالي لا يتعدى متابعة التعليقات و الصور الساخرة، و مراقبة الصدمة على وجه من يسألني عن مرشحي الرئاسي عندما أقول بكل تلقائية…هياتم طبعا!انا مش مهتم بالموضوع، و مش مهتم بالصراعات الدائرة بين مرشحي أبو أسماعيل أو أبو الفتوح، و ليه أبو اسماعيل هو المرشح المثالي، و البوست اللي بعدها على طول ليه أبو إسماعيل هو أسوأ إختيار ممكن للرئاسة. أنتو عرفتوا ان تحقيقات النيابة توصلت ﻷن المتهم الرئيسي في مذبحة بورسعيد، فرّان ؟المهم، النهاردة..راجع من الشغل، ضربت الغدا المتين و فتحت الفيس بوك زي أي شاب سيس المفروض يقراله كلمتين ينفعوه و بيطنش…ألاقي في وشي بوست لطيفة جدا لواحد من أعز أصدقائي و أحد زملاء العمل السابقين، عبارة عن لينك لبرنامج أبو أسماعيل الإنتخابي الرسمي. فتحته و قلت اشوف بيقولوا ايه. موقفي منه ثابت و محدد و مبني على مجموعة من المواقف في الفترة السابقة، بس قلت أهو اتفرج…لدهشتي لقيت عشر صفحات من الكلام الإنشائي المرسل، الذي لايرقى إلى مستوى موضوع تعبير لطالب متوسط في الإعدادية! الموضوع وصل لمرحلة ان ألمانيا و فرنسا ممكن يقفلوا “حنفية” السياحة في البلد..أيوة، زي ما حضراتكوا شايفين كده بالظبط، برنامج إنتخابي رئاسي، لمحامي و داعية إسلامي معروف، بيستعمل مصطلح حنفية السياحة!طبعا انا قلت حتلاقيه عيل من مريديه كاتب شوي كلام على قد فهمه بقى و خلاص، أكيد الراجل مش كاتب الكلام ده يعني..إتأكدت من صديقي اللي حاطط البوست لأكتشف ان الكلام ده كوبي و بيست من الموقع الرسمي للمرشح و بيمثل فعلا برنامجه الإنتخابي الرسمي!البرنامج عبارة عن مجموعة من الفقرات. كلام مرسل ضعيف البناء. بيتكلم في مجموعة من الأحلام و التوقعات و التصورات الكرتونية الرومانسية بدون أي تصور أو الية لتحقيقها أو حتى وصف حقيقي لأسبابها..انا مش قادر طبعا أكتب عن الموضوع و لا محتوى البرنامج من غير ما ابان متحامل على الراجل، بس ححاول قدر الإمكان اكون محايد، ده غير انه عشان يتناقش بالكامل محتاج وقت و مجهود، حرام أضيعه عليه…انا مش فاهم يعني ايه الـ “إفتئات على الحد الأدني للإنسان”، بس دي تقريبا بتتمثل في ان ما فيش دورات مياة صالحة في العشوائيات. و هو شايف ان عشان نحل مشكلة العشوائيات بشكل مؤقت و سريع، احنا ممكن نعملهم مبنى مرافق كبير يضمن وجود دورات مياة إنسانية و منفصلة للجنسين للحفاظ على كرامتهم. وده مش حل نهائي، ده حل مؤقت لحد مانشوف حل دائم لحفظ كرامتهم. هو حل شكله حلو قوي و حونين، بس يدل على ان المرشح تقريبا عمره ما دخل منطقة عشوائية و لا يعرف حاجة عن مشكلة العشوائيات في مصر، و لا يقدر يتخيل ان الحمامات دي حتتسرق كل بلاطة فيها كمان :)البرنامج بيلخص السياسة الخارجية بأنها دراسة الدولة الأخرى، و بيخلط بين مفاهيم السياسة الخارجية و التجارة الخارجية. موقفة من مجانية التعليم مش صريح، بس هو شايف ان الإعفاء من المصاريف ده يكون للمتفوقين بس، و ده حيكون دافع للأسرة انها توفر “جو تعليمي” للطالب عشان تستفيد من الخصم، ده مش عشان التعليم مهم ولا حاجة، عشان الخصم بس. معلش الحته دي مهمة عندي شوية..طيب ايه موقف الناس اللي بيشتغلوا عشان يصرفوا على أهاليهم و بيدرسوا في نفس الوقت و مش قادرين يتفوقوا ؟ ايه موقف اللي أهاليهم قرروا يحاربوا الغلاء بالإستغناء و يكبروا دماغهم من التعليم من أصله…أيه موقف الإسرة اللي راجلها و ستها بيشتغلوا ليل نهار عشان ياكلوا عيالهم و مش عارفين يجيبوا الـ”جو التعليمي” للعيال ؟ بناقصهم دول و لا ايه ؟موضوع الرعاية الصحية بقى جامد جدا. الدكاترة زي الفل و التمريض و الخدمة الطبية هم اللي وحشين..الخدمة الطبية الوحشة دي اللي بيقدمها بشكل اساسي الأطباء، اللي المفروض انهم كويسين، بس قشطة مش مهم، انا فاهم انه قصده الخدمة في المستشفيات. مع كامل إحترامي، المرشح بيتعامل مع المشكلة بطريقة تاجر المواشي اللي عايز يحسن النسل عنده في المزرعة..مدير الوحدة الصحية حيتحاسب على مدى رضا الناس عنه، مش على قياس علمي للرعاية الصحية و لا أداء مهني و لا علمي. و لو فشل في انه يدلع الناس، حيخلي مرتبه زي الطبيب العادي!!الإهتمام بالفقراء ودعم الأغنياء….في مجتمع ينطق بالوئام والتواد والحب والروي والعطف والرفق والدعاء بين أفراده أجمعين متحابين متآزرين….بس كده خلاص :) شوفتوا وئام حلوة أزاي؟البرنامج كله كلام إنشائي مرسل، مافيش أليات و لا خطط و لا حتى مسار سليم لحل مشكلة واحدة. كلام كبير و عاطفي و حماسي و كله ناس متحابين و متازرين، بس سطحي جدا جدا و يدل على عدم إدراك لأبعاد اي مشكلة من اللي أتكلم عنهم و بيوعد بحاجات لايمكن قياسها و لا قياس مدى نجاحها، ومالهاش أي مدى زمني معني. زي مايكون ناوي يحكم للأبد:)ده غير انه مفعم بالأرقام و الحقائق اللي مالهاش أي اساس زي ألمانيا اللي بتستفيد من الرمل، و الصحراء الغربية اللي حتأكلنا قرنين إلا ربع..صديقي اللي عمل شير للكلام ده، معاه ماجيستير في إدراة المشاريع…سألته لو جالك واحد معاه خطة مشروع مكتوبة بنفس الطريقة دي و المحتوى ده كده، و طلب منك تستثمر فيها 10000 جنيه بس..حتديله فلوس و لا لأ؟…طال الحوار لما يقارب الساعة، و صديقي بيحاور و بيتنصل من الإجابة..و في الأخر سابني و مشي…صديقي العزيز، عايز تنتخب حد عشان انت مؤمن بيه بشكل شخصي، حقك، بس ما تجيش تقولي برنامجه الإنتخابي هو الأصلح و الأقوى و اللي مغطي كل حاجة..ﻷن لو واحد تاني، جالك بنفس البرنامج، حترفضه تماما…و أخيرا…انا أتضحلي ان معظم المدافعين عن أبو أسماعيل و المعارضين له، ماقروش برنامجه اساسا، ﻷنهم لو قروه مش حيقعدوا يدوروا على فيديوهات و الدرر دي كلها هنا :Dأصدقائي مؤيدي ابو إسماعيل…إن كنتم أيدتوه بدون قراءة البرنامج ده بعناية، أحب أقولكم..هااااااااااااااااااااااااااااااااااار اسود…و ان كنتم ايدتوه بعد قراءة و أقتناع ببرنامجه الإنتخابي..أحب أقولكم…لا ..مفيش كلام يتقال تاني خلاص :)