You are here

الجهل على دين أمك

أوتوجراف - Fri, 05/05/2006 - 3:33am


شعار المرحلة منذ ما يقرب من شهرين فاتوا
كانت كل حاجة بالنسبة لى بتعنى الجهل اى تصرف مش عاجبنى بعتبره جهل
لدرجة انى كتبت البروفيل بتاعى على الموبايل صورة عبارة عن كلمة الجهل كبيرة وكاتبه تحتها على دين امك عشان لما اى حد ييجى يقراها يحس على دمه شوية :-(
كنت وقتها لسه قارئة رواية الجهل لميلان كونديرا
الراجل ده بجد مؤذى فعلا ... الرواية جميلة جدا بس فى نفس الوقت مؤذية جدا وبتوقع حاجات كتير اوى وبتخلى الواحد يبص جوا نفسه بطريقة مفزعة
مش هحكى عن الرواية لانى مش بعرف احكى ولو حكيت المعنى هيضيع تماما
بس هى بتناقش فكرة مؤذية جدا .. فكرة الحنين للوطن وان الواحد لو عاش حياته فى مكان تانى وبقى له حياة تانية مش هيبقى فيه اى معنى للوطن اللى انت اتولدت فيه واللى ليك فيه برضه حاجات تانية
هو مش شايف اى معنى للكلام عن الحنين للوطن والكلام الاهبل ده لان ببساطة الواحد هو اللى بيعمل وطنه وبيختاره مش الوطن هو اللى بيعمل الشخص
وفى الاخر مش بيقدم بديل
بيحطك فى خانة اليك فعلا
اللى هو اوك مفيش معنى للحنين للوطن .. طب فين الوطن بقى؟ مش مهم... اى مكان انت تختاره ويبقى لك فيه حياه
بيحط الواحد فعلا فى العدم
يعنى بيهدم الثوابت وفجأة بيحط البنى آدم فى الفراااااااااااااااااااغ الشديد
قريت الرواية وخدت فترة كسل شديد
مش بقرا حاجة ومش بعمل حاجة ولقيت نفسى بسافر كتير جدا ومش بستقر فى مكان واحد لاكتر من 5 ايام دى اقصى مدة حاليا بقعدها فى اى مكان
بدأت أدور وبدأت اهتم وارجع افكر تانى فى الفكرة دى ... طب انا وسط ده كله فين وطنى
بسافر كتير وبروح وباجى وبلعب بس فى الاخر مش لاقية مكان محدد ارجع ليه
البلد اللى انا اتولدت فيها اللى هى فيها بيتنا مش بقعد فيها اكتر من شهرين بالكتير اوى فى السنة كلها وبقيت السنة سفر فى نص محافظات مصر
ايام زمان كنت بفكر انى بحب البلد دى وانها بجد بتوحشنى لما بغيب عنها بالرغم من انى مش عايزة استقر فيها
دلوقتى خلاص مش بقعد فيها كتير وما بقتش بتوحشنى وكل الحاجات اللى كنت بحبها فيها بقيت بلاقيها فى اماكن تانية
والملكية اتنقلت لأماكن تانية كتير اوى
حاسة ان كل جزء فيا محطوط فى مكان معين
كمان فى فكرة انى مثلا بعد 10 سنين لما استقر فى مكان معين وحد ييجى يسألنى انتى منين.. المفروض ارد اقوله ايه.؟
اقوله انى من البلد اللى اتولدت فيها ولا البلد اللى عايشة فيها وقتها ولا البلد اللى درست فيها ولا البلد اللى قرايبى فيها ؟
فكرة الانتماء لمكان معين اساسا ايه مقياسها ؟
وان مكان معين يوحشنى طب المكان ده بيوحشنى ليه
احيانا كتير جدا اسكندرية بتوحشنى وانا عمرى ما رحت اسكندرية غير مرتين على الطاير
طب هو انا حاليا لو استقريت فى مكان معين هيتلاشى الحنين لأى مكان؟
بس انا بالفعل حاليا مش بتنتابنى اى حنين لاى مكان لانى حاسة انى بقيت لا منتمية لأى مكان.. وأعتقد ده شىء طبيعى
اصل انا مش هعمل زى شغل الافلام بتاع زمان وهى دى مصر يا عبلة ومش عارف ايه
اوك انا موافقة ان مفيش حنين لاى وطن بس فين الوطن!!!!!!